Ynghylch

Ymwelydd haf â Phrydain yw’r gog, gan gyrraedd o Affrica ddiwedd mis Mawrth ac yn ystod mis Ebrill. Mae’r gog yn enwog am ddodwy ei hwyau yn nythod adar eraill, gan eu twyllo i fagu ei chywion. Mae llwyd y gwrych, corhedydd y waun a thelor y cyrs yn cael eu twyllo’n gyson gan y tric yma. Mae cywion y gog yn tyfu’n llawer mwy na’u rhieni maeth diniwed ac yn aml byddant yn gwthio unrhyw wyau eraill allan o’r nyth. Mae’r gog, beth bynnag yw ei hoedran, yn hoffi bwyta pob math o bryfed, ond lindys blewog yw ei ffefryn!